സെക്രട്ടേറിയറ്റ് തീപിടിത്തത്തില്‍ ഷോര്‍ട്ട് സര്‍ക്യൂട്ടിന് തെളിവില്ലെന്ന ഫോറന്‍സിക് റിപ്പോര്‍ട്ട് തള്ളി പൊലീസ്. തീപിടിത്തം ഫാനില്‍ നിന്നാണുണ്ടായതെന്നും, മദ്യക്കുപ്പിയില്‍ തീപിടിച്ചിട്ടില്ലെന്നും പൊലീസ് പറഞ്ഞു. ഇത് വിശദീകരിക്കുന്ന വീഡിയോയും പൊലീസ് പുറത്തുവിട്ടിട്ടുണ്ട്.
'അടഞ്ഞു കിടന്ന ഓഫീസില്‍ ഫാന്‍ നിരന്തരമായി കറങ്ങുകയും കോയില്‍ ചൂടായി സ്പാര്‍ക്കുണ്ടാകുകയും ചെയ്തു.വയറിന്റെ ഇന്‍സുലേഷന്‍ പോയതാണ് തമ്മില്‍ ഉരയാന്‍ കാരണമായത്.' സ്പാര്‍ക്കില്‍ നിന്ന് തീ ഫാനിലേക്ക് പടരുകയും ഫാനിലെ പ്ലാസ്റ്റിക് വസ്തുക്കള്‍ തീപിടിച്ച് ഫയലിലേക്ക് വീണ് തീപിടിക്കുകയും ചെയ്തുവെന്നാണ് പോലീസ് പറയുന്നത്. ഫോറന്‍സിക് റിപ്പോര്‍ട്ട് പുറത്തു വരുന്നതിന് മുമ്പാണ് ഗ്രാഫിക്കല്‍ ചിത്രീകരണം തയ്യാറാക്കിയിരിക്കുന്നത്.
ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
തീപിടിത്തം ഉണ്ടായ സ്ഥലത്ത് നിന്ന് അല്‍പം അകലെയുള്ള കാബിനിലാണ് മദ്യക്കുപ്പികളുണ്ടായിരുന്നത്. കുപ്പിയില്‍ മദ്യം ഉണ്ടായിരുന്നില്ല. കാബിന്‍ ഉപയോഗിക്കുന്ന ഉദ്യോഗസ്ഥരോട് ഇക്കാര്യത്തില്‍ വിശദീകരണം തേടിയിരുന്നുവെന്നും പൊലീസ് പറയുന്നു.
തീപിടിത്തം ഉണ്ടായ സ്ഥലത്ത് നിന്ന് ശേഖരിച്ച സാധനങ്ങള്‍ വിദഗ്ധ പരിശോധനയ്ക്ക് നാഷണല്‍ ലാബിലേക്ക് അയക്കാനും പൊലീസ് തീരുമാനിച്ചിട്ടുണ്ട്.