ഒമ്പത്, പത്ത് ക്ലാസുകളില്‍ പഠിക്കുന്ന കുട്ടികള്‍ക്കും ഉച്ച ഭക്ഷണം നല്‍കാനൊരുങ്ങി സംസ്ഥാന സര്‍ക്കാര്‍. സ്‌കൂള്‍ ഉച്ചഭക്ഷണ പദ്ധതി 9, 10 ക്ലാസുകളിലേക്ക് വ്യാപിപ്പിക്കുന്നതിനായി അടുത്ത വാര്‍ഷിക പദ്ധതിയില്‍ 150 കോടി രൂപ ഉള്‍പ്പെടുത്താനുള്ള ശ്രമങ്ങള്‍ ആരംഭിച്ചു. ഇത് സംബന്ധിച്ച നിര്‍ദ്ദേശം ആസൂത്രണ ബോര്‍ഡിന്റെ പരിഗണനയ്ക്ക് സമര്‍പ്പിക്കാന്‍ പൊതുവിദ്യാഭ്യാസ സെക്രട്ടറി എ ഷാജഹാന്റെ നേതൃത്വത്തില്‍ ചേര്‍ന്ന അവലോകന യോഗം തീരുമാനിച്ചു.
വിദ്യാര്‍ത്ഥികള്‍ക്ക് ആഴ്ച്ചയില്‍ രണ്ട് ദിവസം മുട്ട നല്‍കാന്‍ 46 കോടി രൂപ അനുവദിക്കാനുള്ള നിര്‍ദ്ദേശവും മുന്നോട്ടുവെയ്ക്കും. തദ്ദേശഭരണസ്ഥാപനങ്ങളുടെ പിന്തുണയോടെ പ്രഭാത ഭക്ഷണം ഏര്‍പ്പെടുത്തും. ഉച്ചഭക്ഷണത്തിനുള്ള അരി സ്‌കൂളില്‍ സപ്ലൈകോ എത്തിക്കുന്ന പൈലറ്റ് പ്രൊജക്ട് പിറവം എഇഒയുടെ കീഴിലുള്ള 43 സ്‌കൂളുകളില്‍ നടപ്പാക്കാനും വിജയം വിലയിരുത്തിയ ശേഷം വ്യാപിപ്പിക്കാനും യോഗത്തില്‍ തീരുമാനമായി.
നിലവില്‍ സര്‍ക്കാര്‍/എയ്ഡഡ് വിദ്യാലയങ്ങളിലെ 1 മുതല്‍ എട്ട് വരെയുള്ള ക്ലാസുകളില്‍ പഠിക്കുന്ന കുട്ടികള്‍ക്കാണ് ഉച്ച ഭക്ഷണം നല്‍കുന്നത്. സര്‍ക്കാര്‍ അംഗീകൃത സ്‌പെഷ്യല്‍ സ്‌കൂളുകളിലെ വിദ്യാര്‍ത്ഥികള്‍ക്കും ടെക്‌നിക്കല്‍ ഹൈസ്‌കൂളിലെ എട്ടാം ക്ലാസ് വിദ്യാര്‍ത്ഥികള്‍ക്കും ഉച്ച ഭക്ഷണം ലഭ്യമാണ്.