എ.കെ.ജി സെന്റര്‍ ആക്രമണത്തിന് പിന്നില്‍ ഇ.പി ജയരാജന്റെ ചെറിയ ബുദ്ധിയെന്ന് കെ.പി.സി.സി അധ്യക്ഷന്‍ കെ. സുധാകരന്‍. ജയരാജനെ പ്രതിയാക്കിയാല്‍ ബോംബെറിഞ്ഞവരെ പിടികൂടാനാകുമെന്നും സുധാകരന്‍ പറഞ്ഞു.
സംഭവത്തിന് പിന്നില്‍ ജയരാജനെന്ന് മുഖ്യമന്ത്രി പിണറായി വിജയന് സംശമുണ്ട്. സി.പി.ഐ.എമ്മിനുള്ളില്‍ ജയരാജനെതിരെ അമര്‍ഷമുണ്ട്. വിമാനത്തിനുള്ളില്‍ പ്രതിഷേധക്കാരെ അക്രമിച്ച സംഭവത്തില്‍ ഇന്നല്ലെങ്കില്‍ നാളെ ജയരാജന് പ്രതിയാകുമെന്നും സുധാകരന്‍ കൂട്ടിച്ചേര്‍ത്തു. മാതൃഭൂമി ന്യൂസിനോടായിരുന്നു സുധാകരന്റെ പ്രതികരണം.
'എ.കെ.ജി സെന്റര്‍ തകര്‍ത്തത് ആരെന്ന് ഇ.പി. ജയരാജന് മാത്രം അറിയാം. അദ്ദേഹം പ്രതിയായാല്‍ അല്ലേ പ്രതികളെ പിടിക്കാനാവൂ. അദ്ദേഹത്തിന്റെ ആളെ പ്രതിയാക്കിയാല്‍ അദ്ദേഹം സമ്മതിക്കില്ല. മറ്റു പ്രതികളെ പിടിക്കാന്‍ പൊലീസുകാര്‍ക്ക് തെളിവില്ല. സത്യസന്ധമായി പറഞ്ഞാല്‍ ജയരാജന്റെ ക്രിയേഷനാണിത്. വിമാനത്തിലുണ്ടായ സംഭവത്തിന്റെ ആവര്‍ത്തനമാണിത്. ജയരാജന് ഇപ്പോള്‍ ആ കേസില്‍ പ്രതിയല്ലെങ്കിലും ഇന്ന് അല്ലെങ്കില്‍ നാളെ അദ്ദേഹം പ്രതിയാകും. അതില്‍ ഒരു സംശയവും വേണ്ട,' സുധാകരന്‍ പറഞ്ഞു.
അദ്ദേഹത്തിന്റെ തലയില്‍ ഉണ്ട നടന്ന കഥയറിയില്ലേ? എത്ര വര്‍ഷമാണ് ആ ഉണ്ടയും കൊണ്ട് നടന്നത് പാവം. ഇപ്പോഴാണ് ആ ഉണ്ട പോയത്. ഇപ്പോള്‍ ആ ഉണ്ട ദ്രവിച്ചു പോയെന്നും സുധാകരന്‍ പരിഹസിച്ചു.
സി.പി.ഐ.എമ്മിനകത്ത് ഒരുപാട് നേതാക്കള്‍ പരസ്പരം സംസാരിക്കുന്നത് ആക്രമണം ജയരാജന് ഉണ്ടാക്കിയത് എന്നാണ് എന്നു തന്നെയാണെന്നും സുധാകരന്‍ പറഞ്ഞു. ഞങ്ങള്‍ എകെജി സെന്റര്‍ ആക്രമിക്കാന്‍ പോകുന്നുണ്ടെങ്കില്‍, ആക്രമിച്ചാല്‍ ആക്രമിച്ചത് പോലെയിരിക്കുമെന്നും സുധാകരന്‍ കൂട്ടിച്ചേര്‍ത്തു.