വിവാദമായ മൂന്ന് കാര്‍ഷിക നിയമങ്ങള്‍ പിന്‍വലിക്കാനുള്ള ബില്ലിന് അംഗീകാരം നല്‍കി നരേന്ദ്ര മോദി മന്ത്രിസഭ. നിയമങ്ങള്‍ പിന്‍വലിക്കാനുള്ള ബില്‍ അടുത്ത പാര്‍ലമെന്റ് സമ്മേളനത്തില്‍ കൊണ്ടുവരുമെന്ന് നേരത്തെ പ്രധാനമന്ത്രി അറിയിച്ചിരുന്നു.
നവംബര്‍ 19നാണ് കാര്‍ഷിക നിയമങ്ങള്‍ പിന്‍വലിക്കുന്നതായി പ്രധാനമന്ത്രി പ്രഖ്യാപിച്ചത്. പ്രതിഷേധിക്കുന്ന കര്‍ഷകരോട് അവരുടെ വീടുകളിലേക്ക് മടങ്ങാന്‍ മോദി ആവശ്യപ്പെടുകയും ചെയ്തിരുന്നു.
നിയമങ്ങള്‍ പ്രധാനമായും രാജ്യത്തെ ചെറുകിട കര്‍ഷകര്‍ക്ക് വേണ്ടിയുള്ളതായിരുന്നുവെന്നാണ് പ്രധാനമന്ത്രി പ്രഖ്യാപന വേളയില്‍ പറഞ്ഞത്. കര്‍ഷക ക്ഷേമത്തിന് സര്‍ക്കാര്‍ എന്നും മുന്‍ഗണന നല്‍കിയിട്ടുണ്ട്. കര്‍ഷകപ്രയത്നങ്ങള്‍ നേരില്‍ കണ്ടായാളാണ് താന്‍. രണ്ട് ഹെക്ടറില്‍ താഴെ മാത്രം ഭൂമിയുള്ളവരാണ് ഭൂരിഭാഗം കര്‍ഷകരും. അവരുടെ ഉന്നമനത്തിന് മുന്‍ഗണന നല്‍കുമെന്നും മോദി പറഞ്ഞിരുന്നു.
അതേസമയം പഞ്ചാബ്, ഉത്തര്‍പ്രദേശ് തുടങ്ങിയ സംസ്ഥാനങ്ങളില്‍ തെരഞ്ഞെടുപ്പ് മുന്നില്‍ കണ്ടാണ് പ്രധാനമന്ത്രിയുടെ പ്രഖ്യാപനം എന്ന വാദങ്ങള്‍ ഉയര്‍ന്നിട്ടുണ്ട്. എന്നാല്‍ നിയമങ്ങള്‍ പിന്‍വലിക്കുന്നത് വരെ സമരം തുടരുമെന്നാണ് കര്‍ഷകര്‍ അറിയിച്ചത്. സര്‍ക്കാര്‍ താങ്ങുവില ഉറപ്പു വരുത്തണമെന്നും കര്‍ഷകനേതാക്കള്‍ പ്രതികരിച്ചിരുന്നു.