ഡല്‍ഹി പൊലീസിനെതിരെ രൂക്ഷ വിമര്‍ശനവുമായി സുപ്രീംകോടതി. പൊലീസിന് പ്രഫഷണലിസം ഇല്ലാത്തതാണ് പ്രശ്‌നങ്ങള്‍ക്ക് കാരണമെന്നും, എല്ലാം സംഭവിക്കുന്നത് പൊലീസിന്റെ കണ്‍മുന്നിലാണെന്നും കോടതി കുറ്റപ്പെടുത്തി. നിയമപ്രകാരം പ്രവര്‍ത്തിക്കാത്തത് കൊണ്ടാണ് ഡല്‍ഹിയില്‍ അനിഷ്ടസംഭവങ്ങള്‍ ഉണ്ടാകുന്നതെന്നും കോടതി ചൂണ്ടിക്കാട്ടി.
ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
സോളിസിറ്റര്‍ ജനറലിന്റെ വാദങ്ങളില്‍ കോടതി അതൃപ്തി രേഖപ്പെടുത്തുകയും ചെയ്തു. പൊലീസ് കൃത്യമായ നടപടികള്‍ സ്വീകരിച്ചിരുന്നുവെങ്കില്‍ പല പ്രശ്‌നങ്ങളും ഒഴിവാക്കാന്‍ സാധിക്കുമായിരുന്നു. ബ്രീട്ടീഷ് പൊലീസിനെ കണ്ടു പഠിക്കണം. പ്രകോപനപരമായ പ്രസംഗങ്ങളില്‍ ബ്രിട്ടണിലെയും അമേരിക്കയിലെയും പൊലീസുകാര്‍ ഉടനടി നടപടി സ്വീകരിക്കാറുണ്ട്. അവര്‍ ഉത്തരവിനായി കാത്തിരിക്കാറില്ല. പൊലീസില്‍ നവീകരണം ആവശ്യമാണെന്നും കോടതി നിരീക്ഷിച്ചു. വടക്കു കിഴക്കന്‍ ഡല്‍ഹിയിലെ കലാപത്തില്‍ പ്രത്യേക അന്വഷണ സംഘം വേണമെന്ന ഭീം ആര്‍മി നേതാവ് ചന്ദ്രശേഖര്‍ ആസാദിന്റെ ഹര്‍ജി സുപ്രീംകോടതി തള്ളി. ഡല്‍ഹിയില്‍ സംഭവങ്ങളില്‍ തല്‍ക്കാലം ഇടപെടാന്‍ സാധിക്കില്ലെന്നും, ഷഹീന്‍ബാഗിലെ റോഡ് ഉപരോധം മാത്രമേ ഇപ്പോള്‍ പരിഗണിക്കാനാകൂ എന്നും കോടതി വ്യക്തമാക്കി.
അതേസമയം ഡല്‍ഹില്‍ അക്രമം നിയന്ത്രിക്കാന്‍ സൈന്യത്തെ വിളിക്കണമെന്ന് കെജ്‌രിവാള്‍ ആവശ്യപ്പെട്ടു. ആശങ്കാജനകമായ സ്ഥിതിയാണ് ഡല്‍ഹിയിലേത്, നിയന്ത്രിക്കാന്‍ പൊലീസിന് കഴിയുന്നില്ല. കേന്ദ്രആഭ്യന്തരമന്ത്രി അമിത്ഷായ്ക്ക് ഇതുസംബന്ധിച്ച് കത്ത് നല്‍കുമെന്നും കെജ്‌രിവാള്‍ പറഞ്ഞു.